Me rastin e 9 Majit Mustafa i kërkon BE-së që t’i heqë vizat për Kosovën
Nëpërmes një urimi me rastin e 9 Majit, Ditës së Evropës, kryetari i Lidhjes Demokratike të Kosovës (LDK), Isa Mustafa, i ka kërkuar Bashkimit Evropian që t’i heqë vizat për Kosovën.
“Rruga evropiane e Kosovës është shumë e qartë, ajo synon anëtarësimin në familjen e madhe evropiane. Aktualisht Kosova është i vetmi vend pa liberalizim të vizave dhe ne shprehim bindjen që BE-ja sa më shpejt ta marrë një vendim pozitiv që kosovarët të mos mbesim të vetmit të diskriminuar jo vetëm në Ballkanin Perëndimor por në tërë Evropën. Qytetarët dhe të rinjtë tonë besojnë dhe ndajnë të njëjtat vlera të cilat Bashkimi Evropian i ka kultivuar për tërë këto vite”, ka thënë Mustafa.
Sipas tij, Kosova i është mirënjohëse BE-së për përkrahjen e vazhdueshme që i ka dhënë shtetit tonë në proceset shtetformuese dh kjo u rezultua edhe në kohën kur ne e nënshkruam MSA-në që deri më tani është kontrata dhe bashkëpunimi në nivelin më të lartë me BE-në.
“Dita e Evropës shënon një ndër momentet më të rëndësishme të vendosjes së paqes në Evropën e trazuar nga luftrat ndër shekuj. Më 9 Maj 1950, Robert Schumann vendosi themelet e bashkëpunimit ndërshtetëror, fillimisht si projekt ekonomik për tu shndërruar më vonë në nivelin e bashkëpunimit politik, kulturor, shoqëror dhe fusha tjera”, shtoi Mustafa.
Ai tha se BE-ja është storie e suksesit që i dha Evropës jo vetëm një paqe afatgjate por edhe një prosperim dhe mirëqenie ekonomike shteteve anëtare.